मुंबई, दि. १८ :- सुप्रसिद्ध मराठी समीक्षक प्रा. डॉ. सुधीर रसाळ यांना साहित्य अकादमीचा पुरस्कार जाहीर झाला आहे, ‘विंदांचे गद्यरूप’ या त्यांच्या समीक्षणात्मक पुस्तकाला पुरस्कार देण्यात आल्याची घोषणा साहित्य अकादमीने केली आहे. रसाळ हे मराठी साहित्यशृष्टीत प्रामुख्याने समीक्षक म्हणूनच ओळखले जातात.
वयाच्या ९१ व्या वर्षीही साहित्यसेवा करीत असलेले जेष्ठ समीक्षक प्रा. डॉ. सुधीर रसाळ यांना २०२४ च्या पुरस्कारांमध्ये ताम्रपट आणि एक लाख रुपये असे पुरस्काराचे स्वरूप आहे.
हजारो विधार्थी घडविणारे मराठी भाषेचे प्राध्यापक व समीक्षेची प्रतिमासृष्टी निर्माण करणाऱ्या या साहित्यिकास साहित्य क्षेत्रातील सर्वोच्च पुरस्कार जाहीर झाल्याबद्धल त्यांचे सर्वत्र अभिनंदन होत आहे.
साहित्य अकादमीचा पुरस्कार जाहीर झाल्याबद्दल ज्येष्ठ समीक्षक डॉ सुधीर रसाळ यांचे मुख्यमंत्री देवेंद्र फडणवीस यांनी अभिनंदन केले आहे. या पुरस्कारामुळे मराठी समीक्षा क्षेत्रातील एका व्रतस्थ साहित्यिकाचा सन्मान होत आहे, अशा शब्दात मुख्यमंत्री श्री. देवेंद्र फडणवीस यांनी आनंद व्यक्त केला आहे.
भारत सरकारच्या सांस्कृतिक मंत्रालयाच्या राष्ट्रीय साहित्य संस्थेच्यावतीने आज साहित्य अकादमी पुरस्काराची घोषणा करण्यात आली. यात डॉ रसाळ यांच्या विंदांचे गद्यरूप या समीक्षात्मक पुस्तकाला हा पुरस्कार जाहीर करण्यात आला आहे.
शुभेच्छा संदेशात मुख्यमंत्री म्हणतात, डॉ रसाळ यांचे मराठी साहित्य विश्वातील योगदान अमुल्य असे आहे. मराठी भाषेचे अध्यापन, संशोधन, संपादन आणि समीक्षा असा त्यांचा चौफेर विहार राहीला आहे. विशेषतः त्यांचे मराठी काव्यविषयक संशोधनात्मक लेखन मौलिक असे आहे. समीक्षेतून कठीण विषय सहज-सुलभपणे समजावून देणारी त्यांची शैली नवोदितांना आश्वासक वाटते, यातच त्यांचे मोठेपण आहे. मराठी भाषा जतन, संवर्धन तसेच साहित्य विषयक चळवळीतील संस्था, समित्यांवरही डॉ रसाळ सक्रीयपणे कार्यरत आहेत. त्यांच्या समीक्षात्मक लेखनाला राष्ट्रीयस्तरावर मिळालेली ही दाद नव्या पिढीसाठी प्रेरणादायी ठरणार आहे. डॉ. रसाळ आजही तितक्याच तडफेने लेखन, संशोधनात कार्यरत आहेत. त्यांच्या हातून यापुढेही मराठी साहित्याची अशीच अखंडित सेवा घडत राहो. त्यांना उत्तम आरोग्य, दीर्घायुष्य लाभो या शुभेच्छांसह मुख्यमंत्री श्री. फडणवीस यांनी डॉ. रसाळ यांचे अभिनंदन केले आहे.
सर्वोच्च पुरस्काराचा आनंद
आजवर विविध २८ पुरस्कार मिळाले, मात्र, मराठी भाषेतील साहित्यास मिळणारा सर्वोच्च साहित्य अकादमीचा पुरस्कार माझ्या ग्रंथास जाहीर झाला, तो मला मिळाला याचा आनंद आहे. – डॉ. सुधीर रसाळ
